政壇：搞搞政：建制謀修例篩走細黨

現時立法會選舉採用比例代表制加最大餘額法，以人口密集新界東、西選舉為例，除咗公文袋喺開行吸票機下吸到一成四得票，同埋社民連梁國雄取得一成多得票率之外，當中新民主同盟范國威只係得到百分之六點二嘅得票率，就能夠成功取得末席當選。

眼見現行選舉制度有利細政黨入局，於是有建制派人士密謀重新設計整個選舉制度，最直接嘅方法係取消比例代表制或最大餘額法，以杜絕一啲代表少數聲音入局。但呢項始終係「大手術」，要取得共識並唔係咁易，於是又有人提出折衷方法，就係將選區劃得細啲，令激進派嘅少數支持者難以聚集選票，變相趕絕細政黨。

事實上，有泛民政黨亦同意劃細選區有助選舉工程，但有泛民中人就話最怕到時選區唔大唔細，半桶水對邊個都冇着數，又話如果建制派淨係由政治機心出發，諗住劃細選區就可以篩走代表少數嘅聲音，居心叵測但又隨時捉蟲，事關今屆立法會選舉中，建制派僅以百分之六咁上下當選嘅候選人亦大有人在。