政壇：龐愛蘭哪吒碰頭互當透明

立法會選舉都過咗兩個星期，所有結果都塵埃落定，但之前喺新界東爭票嘅「哪吒」方國珊同Scarlett龐愛蘭，尋日一同出席活動見面時就仍然面左左，全程冇乜交流，哪吒仲因為有事，活動未完就走，連大合照都冇影添！

話說兩位女士尋日以評審身份一同出席活動，主辦單位「好識趣」咁安排咗二人一齊坐，而佢哋亦好大方，不斷熱情地同身邊嘅人敍舊同交換卡片，不過唔知點解打極招呼都未到並肩而坐嘅對方之嘛，而寒暄一輪過後，雙方都係背脊對背脊。哪吒就話要同前靚女藝人魏秋樺敍舊。

雖然佢哋坐得這麼近，鎂光燈喺佢哋面前閃呀閃，但佢哋就避避忌忌，對鏡頭嘅敏感度亦忽然下降，好似唔多想一齊合照，而Scarlett更埋頭苦幹整理卡片，點都唔肯抬頭望鏡頭，結果要攝影哥哥三催四請，呢個僵局先得以打破，影到一張貌合神離嘅合照。