政壇：社民連思考出路

喺早前嘅立法會選舉中，社民連淨係得主席「長毛」梁國雄以大熱姿態成功連任，其餘三區都敗北。當中副主席吳文遠以新星身份首次出戰港島都只係攞到三千幾票，成績算係麻麻。吳文遠分析，話自己係輸畀選民嘅「棄保效應」，雖然唔少港島區選民支持佢參選，但由於大部分人都覺得佢冇機會贏，於是改投其他更有勝算嘅候選人。佢又悲觀咁話如果情況持續，社民連最後只會淪為一人黨，對社民連長遠發展不利。

黨內缺水谷宣傳

吳文遠透露，好多人曾建議社民連好似公文袋咁叫長毛排第二力谷新人上位，但長毛同其他執委都覺得新人要靠自己打響名堂，所以最後都冇接納呢個建議。佢又話黨內現正度橋思考社民連未來路向，包括參考其他政黨咁用新興媒體向外推銷社民連各新人，喺未來四年盡力谷高知名度，希望到時選民口話支持社民連之餘，最後投票都係投番畀佢哋喎。

佢又話，佢嘅選舉工程大概用咗五十萬至六十萬元，雖然喺選舉前大約籌到三十萬元，但仲要攞啲私己錢出嚟倒貼二十幾萬元，搞到依家要開始搵工幫補家計。佢話有「丐幫」之稱嘅社民連選舉後除要面對新舊交接嘅問題外，另一個需要解決嘅問題就係「缺水」，又大嘆自己由於喺選舉中冇錢做宣傳印傳單，搞到好多住喺港島嘅人都唔知佢嘅存在。佢又話社民連雖則每年喺年宵同七一嘅籌款額都冠絕泛民，但佢哋依家仲要再諗吓有冇其他方法開拓財源，等下屆其他候選人可以印多啲傳單增加知名度。