無牌食肆進商廈 監管不力埋炸彈

香港唔止乜都有，而且乜都得，有法例等於冇法例，有執法等於冇執法，簡直自由到加零一。

本報踢爆，為訪港旅客提供廉價住宿嘅尖沙咀美麗都大廈，原來已經淪為無牌食物工場嘅「天堂」。係人都知，商廈經營食品加工必須領牌，咁多年來食環署從未向大廈內任何一個單位發過「食物製造廠牌照」，奇就奇在，家陣大廈內至少有三間無牌「茶餐廳」，有啲唔止將單位變食肆，仲做埋外賣生意添。正如有區議員話齋，呢啲無牌食物工場防火設施欠奉，萬一發生火警或其他意外，後果不堪設想。

話時話吖，美麗都大廈位處鬧市，廉價賓館林立，萬一唔好彩畀祝融光顧，燒通頂唔在講，仲隨時火燒連環屋連累埋街坊，問你驚未？

講真，如果唔係政府監管失職，執法不力，做嘢甩漏，商廈又點會變成無牌食物工場吖。其實，無牌經營呢家嘢，唔只有食肆，仲有無牌賓館、無牌產品等等，簡直係無奇不有。當局闊佬懶理，冇監冇管，呢類都市炸彈「梗有一個喺左近」，成為市民揮之不去嘅噩夢。

呢嗱，近年足浴店開到成行成市，有業者將單純洗腳按摩嘅足浴店，變身做招呼旅客過夜嘅「足浴客棧」，擺明車馬違例經營，警方同消防就隻眼開隻眼閉，關人個關，問你服未。有店主甚至喺燈箱貼上「歡迎自由行按摩過夜」標語，當街拉生意，直情視法例如無物。

同無牌食肆一樣，無牌賓館消防設施嚴重不足，萬一發生意外，香港遊隨時變成地獄遊都似。除咗防火問題，呢類無牌經營場所衞生環境同樣冇監管，再加上普遍存在嘅僱用黑工等問題，已經構成嚴重嘅安全隱患。

仲有吖，利用團購方式預訂酒店、船票同參加旅行團近年日漸流行，旅遊業議會發現有網上團購嘅旅遊產品，並無刊登旅行社嘅相關資料，懷疑涉及無牌經營旅遊業務，消費者幫襯，隨時血本無歸。弊在呢類不良經營手法曝光後，到依家仲未見當局有任何跟進。

太一叮都係嗰句，市民安全大過天。既然新政府話「民生無小事」，咁就要做嘢喇，打擊無牌經營必須從強化監管入手，有法必依，違法必究，執法必嚴，絕對唔可以手軟o架，否則，萬一爆大鑊，見到棺材至流眼淚，咁就太遲嘅喇，叮！