政壇：搞搞政：李家仁自嘲煲冬瓜水皮

以《小明上廣州》一曲驚天下嘅李家仁醫生，呢幾年擺落唱歌事業嘅心機恐怕多過醫學界好多。尋日佢出席一個普通話電台節目時，用普通話唱《小明上廣州》，點知全曲除咗「小明上廣州」嗰五隻字外，其他嘅普通話真係好難聽得明，講到李醫生都要自嘲一句「呢啲係最標準嘅港人普通話」！

「煲冬瓜」被驗證水平麻麻後，李醫生尋日又衰多鑊，事關首歌嘅歌詞提到廣州好多景點，司儀以為李醫生對廣州好熟啦，就同佢一問一答傾吓偈。點知一問之下，李醫生答唔出香港去廣州直通車嘅票價，只好解釋話香港去廣州嘅車分好多種，佢去親都只係負責畀錢，所以數口唔好喎。咁又係嘅，首歌只係話小明搭高鐵，都冇講到佢搭直通車。

李醫生仲喺個節目上預告未來嘅新歌，仲叫在場嘅小朋友估吓小明下次去邊？有小朋友答話去動物園，李醫生即刻話差唔多啱啦，因為下次小明會去澳洲睇袋鼠，聽聞仲係首英文歌添！