政壇:鍾樹根自嘲超齡新秀

立法會選舉之後,建仔贏咗議席輸咗面子,皆因曾有票王之稱嘅副主席劉江華輸咗。尋日同樣參加選戰、並喺港島區成功奪取一席嘅第二梯隊成員鍾樹根大講未來,竟話諗住做立會議員兩屆起、三屆一定止,恍似港島選民任佢指揮咁;另一邊廂嘅劉江華就似乎有啲謝,講起政壇生涯,佢話自己曾歷經三上四落。建仔上下似乎仲未消化好今次選舉結果噃!

「唔好阻住個位咁耐」

今次選舉中,多個政黨嘅第二梯隊黨員都有出頭天,鍾樹根尋日出席一個電台節目時,被問到今次當選係咪遲來的春天?佢就答:「遲係遲啲,但個春天都嚟到。」佢跟住話呢個春天都唔會太長,因為「我係超齡新秀,仲有好多人排住隊湧上來,唔好阻住個位咁耐,我諗住做兩屆起、三屆一定止!」兩至三屆即係八至十二年,建仔今次喺港島區奪取兩席,如非泛民分裂,鍾樹根呢一席都幾驚險。但佢就矢言連任兩至三屆,都唔知話佢大想頭,定係睇小咗政局同選民心態嘅變化。

另一邊嘅劉江華就係人辦,做過票王同立法會議員十四年,但一場選舉就全部告終。佢尋日接受電台訪問時都話,二十八歲從政至今,啱啱差唔多二十八年,總結就係政途歷經「三上四落」,二十八年中嘅選戰都四嘗敗績,鍾樹根都真係大諗頭。

不過,劉江華都透露,有圈外人叫佢試吓做副局長,但仲未收到特首梁振英邀請。點都好,有冇得重返政壇係一回事,但劉江華就點咗首《問我》表達心聲,仲話特別鍾意呢幾句歌詞:「願我一生去到終結,無論歷盡幾許風波」,睇嚟劉江華喺政壇歲月中真係學懂風波先係永恒。

第一手消息請下載on.cc東方互動iPhone/iPad/Android/Windows Phone Apps

設計圖片及對白