公僕老化誠足患 高官劣化更堪憂

太一叮真係好後悔冇加入公務員隊伍，唔做嘢有糧出，做錯嘢唔使罰，唔識做嘢更加冇傷肝，論資排輩之下隨時水鬼都可以升城隍，幾爽呀！咦咦咦，唔係呀，遲啲仲話連論資排輩都慳番添，各位大懶蛇，仲唔快啲加入公僕行列！

因乜事公務員唔使排隊就升官發財？哦，原來港府鬧「高官荒」。公務員事務局局長鄧國威發預警，公務員隊伍估計未來五年會爆發退休潮，其中又以政務官嘅人手最不足。

你知啦，政務官系統係高官養殖場，資深政務官大批引退，等如港府高層面臨青黃不接危機。所以咯喎，鄧國威就話嘞，為解決人事斷層問題，以後官員升遷唔一定論資排輩，後浪新進一樣破格擢升。

即係咁，用人唯才，不拘一格，如果港府真係人才輩出，破格擢升年輕才俊，大家唔會有意見，甚至舉腳贊成添。之不過咁喎，港產官僚嘅質素有幾好，大家有目共睹，除咗為自己加薪加假加福利嘅自私效率冠絕全球之外，其他表現概無足觀，怕只怕高官斷層之下質素更加一蟹不如一蟹咋。

試諗下，以前人員充足揀出嚟嘅高官都一巖一巉，將來冇乜得揀時咪更加三尖八角？容乜易水鬼升城隍嘅高官全部都係籮底橙嚟o架？咪話鄧國威擔心啦，香港市民仲擔心呀！

叮你個鎯鎯，你話過氣特首曾蔭權七年嚟係做乜o架？公務員退休潮問題存在多年，高官青黃不接嘅隱憂更加講咗N咁多年，但就從來唔見前朝政府謀劃長遠同未雨綢繆。人口老化唔處理，公僕老化又唔理，權力腐化就做到加零一，貪曾自稱「忠誠公僕」，簡直係全球最強笑話！

阿Ｑ啲諗，公僕爆退休潮其實都唔係完全冇正面意義嘅。橫掂家陣好多高官都係庸碌一輩，唔係懶過懶蛇，就係蠢過蠢豬，集體引退未必唔係好事嚟o架，至少新政府要去除施政瘀血都易啲啦。

唔係咩？回歸十五年，港府施政甩甩漏漏烏龍百出，推重大政策有邊次唔係撞板多過食飯o架？最搞笑嘅係，搞環保變擾民，搞教育惹火頭，扶貧愈扶愈貧，遏抑樓價愈遏愈升。咁嘅施政質素，咁嘅官僚質素，好行夾唔送啦！

咁講啦，公僕老化誠足患，高官劣化更堪憂。唔該鄧國威諗計提升官僚質素，趁新政府求才若渴，快快提拔多啲有才幹、有抱負、有承擔嘅官員出嚟啦，叮！