政壇：政商定格：活化工廈華懋快人一步
最近活化工廈成為熱門話題，華懋集團尋日喺觀塘嘅新酒店已經開幕，集團執行董事龔仁心主持盛事時，話喺政府一連串「起動九龍東」計劃之下，觀塘成為近年區內發展得最快嘅地方，除咗響應「起動九龍東」之外，龔生對政府其他政策都非常支持，留意工廈改建住宅呢類機會。
聽地產界前輩講，早在○○年初，政府提出工業區轉型為商貿地帶，如心艾朗酒店現址地皮，就係當年區內首批獲准重建酒店嘅項目之一，據聞拗補地價都拗咗好耐，由原先每方呎約二千元，減到一千二百元至拍板，涉資逾一點七億元，華懋差啲因為補地價拗唔掂數，考慮放棄發展酒店，改為興建商業物業，好彩最終OK。如心艾朗酒店依家入住率已經差唔多到九成，龔生好滿意，而集團明年初仲會喺九龍西開一間酒店及服務式住宅。
華懋集團執行董事龔仁心（右）與酒店發展及營運總經理鍾慧敏（左），齊齊見證如心艾朗酒店嘅誕生。