政壇：搞搞政：票站調查鍾庭耀自讚好準

大型選舉嘅票站調查到底準唔準？泛民主派質疑建制派濫用票站調查幫自己配票，喺啱啱結束嘅立法會選舉前公開呼籲支持者杯葛、甚至要求佢哋故意欺騙調查員，事後有啲參選人都話畀啲票站調查嚇餐死。港大民意研究計劃總監鍾庭耀尋日出席電台節目時卻賣花讚花香，話佢哋嘅結果幾準確，好似唔記得咗當晚佢哋喺部分選區幾乎話個個候選人當選機會均等嘅事，既然個個都差唔多，點叫「中」呢？應該話係取巧兼縮骨就真！

鍾庭耀尋日話，港大喺今次立法會選舉嘅票站調查結果顯示，向佢哋嘅調查員講假話嘅選民唔多，證明票站調查幾準確。不過，當晚佢預測多達十九張名單大混戰嘅新界東選區結果時，幾乎話個個候選人都係勝出「機會均等」，九龍西嘅選舉結果亦同佢嘅調查有幾大出入！

同鍾庭耀一齊出席電台節目嘅民研計劃高級數據分析師戴捷輝指出，佢哋喺投票結束後凌晨一時公布結果，二十名被歸類為「機會極高」嘅候選人最後全部勝出，九名「機會較高」候選人亦有七人當選。反而佢哋貼中民建聯「票王」劉江華完全冇機會當選超級議員，戴捷輝就冇攞嚟做「成功調查」例子，費事喺劉江華傷口上灑鹽。