政壇：請立會議助白鴿出手奀

新一屆立法會下月就會復會，議員驟然多至七十個，支援人員梗係唔少得。最近多個搵工網站都有議員助理嘅招聘廣告，但要求嘅履歷各有不同，自然造成同工不同酬嘅情況。民建聯創黨主席曾鈺成聘請嘅議員助理，要求負責處理個案及辦事處運作，加上要熟悉策劃同舉辦活動，提供嘅待遇係每月一萬至一萬一千元。亦有白鴿黨嘅雙料議員請議員助理嘅月薪低至九千元。

不過，數到出手最為闊綽嘅議員，始終首推功能界別議員，其中被外間形容為富貴黨嘅議員，議員助理嘅起薪點係每月三萬元兼保證有雙糧，當然要求要有三年經驗並且熟識時事，自不然要有較高人工先有吸引力。新民黨都有刊登廣告請人，其中黨主席葉劉淑儀聘請社區統籌主任，黨副主席田北辰就請議員助理，佢哋不約而同叫有興趣應徵者填寫自己心目中嘅薪酬水平，莫非佢哋出嘅薪酬差距可以好闊嘅？