化妝鉛毒入眼 官僚懶毒入骨

雲想衣裳花想容，春風拂檻露華濃。貪靚係女人嘅天性，所以咯喎，扮靚就係女人嘅本能，化妝品更加係女人嘅終身伴侶。

冇錯，化妝品的確有化醜為美嘅偉大功能，可惜嘅係，世上有啲醜陋事物係好難由醜變番美嘅，例如人心同官僚。所以太一叮提醒各位女士，小心選擇化妝品呀，事關人心險惡，官僚失職，搞到有毒眼影通街賣，叮！

係咁嘅，消委會抽驗咗市面四十一款眼影產品，發現其中一款含鉛量嚴重超標，比內地標準超出九倍，如果用台灣標準更加超出十九倍添！另外，有一款眼影產品含菌比內地標準超出六成半，貪靚女士唔帶眼識貨，隨時扮靚扮出禍，搞到一殼眼淚冇眼睇。

嗱，人心醜惡就係咁解，無良奸商為咗賺錢，不惜搵人命較飛。醫學界係咁講嘅，鉛係有毒重金屬，容易經眼睛黏膜進入人體，長期積聚可能會造成鉛中毒，損害神經系統同腎臟功能。如果孕婦中招，更加會隨時危及嬰兒健康，造成無可彌補嘅傷害。

講到呢度，大家有冇覺得奇怪，點解消委會係用內地標準做測試嘅呢？呢樣就牽涉官僚苟且嘅醜陋一面嘞。真係講都冇人信，化妝產品喺香港居然一直係無王管o架！

沒有最醜，只有更醜。內地黑心食品氾濫成災，有毒產品無處不在，喺咁低劣嘅監管水平之下，對化妝產品都有一套監管法例啦。反而號稱國際都會嘅香港，居然繑埋雙手不監不管，任由有毒眼影靠害市民，港產官僚究竟係眼盲吖，定係心盲呀？如果唔係消委會踢爆，女士咪日日吸鉛毒？

咁講啦，如果話雌性動物嘅天性係貪靚，咁官僚動物嘅天性就係貪懶，長年累月對產品安全嘅監管懶得就懶，搞到懶毒入骨失職害人，今次被消委會踢爆，苟且官僚嘅疏懶醜態一眼睇晒！　

喂，各位港產官僚，納稅人用公帑養到你哋肥肥白白，唔該你哋克盡己職，做好把關本分，唔好再畀有毒化妝產品周街賣啦。好多女士愛靚唔愛命，如果見到通街化妝品淪為毒物，冇得再扮靚美容，真係會同你哋班失職官僚搏命o架，叮！