政壇：政商定格：宜蘭睇神木IT豪開心番
「IT豪」譚偉豪喺立法會資訊科技界選舉中不敵對手莫乃光。競逐連任失敗，佢上星期就飛咗去台灣宜蘭旅行，期間仲去過有名嘅馬告生態公園欣賞參天古樹添！
IT豪尋日喺社交網站貼上旅行嘅照片，話喺公園裏面有好多千年古樹，其中最老嗰棵叫「孔子」神木，樹齡已經二千五百五十幾歲。至於佢照片中嘅大樹，原來叫「顏真卿」神木，呢棵樹亦不遑多讓，已經有成一千歲。
佢喺開票當日亦有去到機場亞洲博覽館等結果，據講當佢知道落敗後，曾經一個人好憔悴咁坐喺博覽館某間咖啡店發呆，好似接受唔到選舉結果咁。點都好啦，喺呢輯旅行相總算係笑容滿面，話佢今次去台灣係散心之旅亦不為過。