政壇：政商定格：星展忻依文唔怕銀監嚴管

有好多賓卡老友都話香港對銀行嘅監管愈嚟愈嚴，真係可以話係「聞之色變」，之不過，星展香港董事總經理兼北亞洲區私人銀行業務主管Yvonne忻依文嘅睇法就有啲特別，佢話「香港啲監管嚴啲，都唔係唔好o架」，因乜解究佢會同行家唱反調？

Yvonne加盟咗星展兩年，之前喺滙豐、花旗呢啲大銀行做過，係一位資深銀行家，佢尋日話：「香港監管係『家長式』管理，新加坡就比較寬鬆啲，但係你一衰咗，佢（監管機構）就嚟嘈你，咁你話上咗軌道有保障好呢（本港情況）？定係做錯嘢人哋嚟砍你好呢？哈哈哈！」真係形容得鬼馬喇！

佢仲話好開心自己管理嘅係私人銀行，唔係零售銀行，因為佢試過走入分行買投資產品，「無個幾兩個鐘都唔好旨意離開銀行，因為客戶經理有一大堆台詞要唸（講解產品內容），都幾痛苦o架！」而私人銀行嘅客戶喺投資方面就比較成熟，係私銀業務嘅好處咁話喎！