政壇：議事廳放氣球長毛萬元贖身
社民連立法會議員「長毛」梁國雄曾兩度趁特首同財爺到立法會時，喺會議廳內放氣球示威，仲有唔夠十日就退休嘅立法會秘書長Pauline吳文華尋日同傳媒茶敍時就話，喺第一次氣球事件後，秘書處職員已早有準備，當長毛第二次嘗試放氣球時，一眾保安就即刻上前制止，令長毛唔小心將個氣球放歪咗，最後卡住喺圓形天花板中間，唔可以再好似上次咁利用升降台就咁攞番落嚟，最後惟有搵清潔公司幫手，喺議事廳中間搭棚上天花板，嘥咗唔少工夫至收拾到殘局。
據講秘書處之後問長毛追討一萬元清潔費，當時長毛仲以為係收番首次嘅原價一千元添，當知道要支付十倍價錢時，即時大嗌「今次真係破產」喇！