政壇：CY宴議員陸恭蕙最人氣

特首CY梁振英聯同十六位高官尋日宴請新一屆候任立法會議員，約有四十位議員出席。CY到場後同每一位議員熱情握手祝賀，佢致詞時話政府好重視同立法會嘅關係，希望呢餐飯會令雙方有個好開始，齊心更好建設社會。

喺午宴主家席上，建仔佔咗四位，富貴黨就佔三位，工聯會同泛民就冇份，唔知呢個座位安排，係咪有玄機呢？不過，難得同特首食晏，唔少議員都爭住向CY發表意見，工聯會王國興更拖埋新人鄧家彪、麥美娟同郭偉強介紹畀CY認識，希望CY可以盡快訂立標準工時，並設立委員會跟進問題。重返政界嘅環境局副局長陸恭蕙好受歡迎，好多議員都同佢寒暄幾句，梁美芬仲好熱情話同陸恭蕙係老朋友喎！

今屆有四分之一議員係新面孔，霎時間要記得晒佢哋啲名，確係有難度。問民政事務局局長曾德成認唔得晒啲議員，佢就懶醒話：「差唔多記得晒啦！」但問佢知唔知漁農界個新議員叫乜名，佢就好猶豫咁答：「何……俊……（邊用手勢對住空氣打個大問號）唔係仁！」跟住知自己講錯嘢，即刻以笑遮醜；漁農界候任議員叫何俊賢呀！