政壇：第二梯隊難靠 富貴黨冇人接班

富貴黨喺今屆立法會選舉搶下五席，成為建制派第三大黨，總算係脫離低潮期。但據聞有黨內人士對香港島嘅選舉工程有微言，覺得班第二梯隊拉票時，做唔到樁腳應有嘅作用，尤其係上年區議會選舉「光復」嘅山頂區，得票竟然係幾百票，得票率低過晒公文袋、白鴿黨、工聯會同建仔。有人認為，班第二梯隊如果咁搞法，下屆好難畀佢哋領軍出戰。

方剛暫代主席位

面對黨內人士抱怨，有富貴黨港島區人士就大為呼冤，佢話睇番啲得票率，除山頂區稍為差少少外，其餘幾個有樁腳嘅選區都算成績唔錯。其中東區寶馬山嘅邵家輝，成功幫黨掘走八百幾票，已經係劉健儀喺港島區得票最高嘅選區。不過，黨內班高層認為咁樣仲未夠，原來佢哋期望每位樁腳附近嘅選區，票源都應該有所增長喎！

淨係識回望都唔係辦法，不如諗吓計仔展望將來啦，尤其係劉健儀空降香港島失敗後已辭咗黨主席一職。一個黨點可以群龍無首，尋晚該黨常委開會搵替代人選，一眾常委通過由現任副主席方剛暫代。本來講咗冇興趣做主席嘅方剛話，立法會事務已經好忙，所以自己係暫代主席，估計十月復會時，黨內會重新搵合適人選喎。

咁究竟真命天子係邊個呢？據聞榮譽主席田北俊同張宇人都對黨主席興趣都不大，有人就建議黨主席唔一定要由立法會議員出任，因為將黨務同立法會事務分開，效率會仲高。至於邊個唔係立法會議員但又有資格出任主席，唔使講已經呼之欲出喇！