回收廚餘助減廢 還望官場先減廢

新人事，新作風，新政府最近任命咗新一批副局長同政治助理，其中環境局副局長陸恭蕙成為焦點之一。無他嘅，一來陸恭蕙係政壇老手，大家都好想睇吓佢可唔可以打破副局政助專門盛產官場廢物嘅宿命；二來咯喎，前朝政府嘅環保工作一塌糊塗，大家自然對呢位環保專家寄予厚望，希望佢能夠輔助局長黃錦星，夾手夾腳將呢檔環保爛攤子收拾乾淨啦！

嗱嗱嗱，拯救環境真係刻不容緩o架，事關本港盛產垃圾嘅地方唔止得官場，仲有尋常老百姓嘅千家萬戶，單單一樣廚餘廢物咋，已經隨時足以令香港變成垃圾崗。

嗱，最新調查顯示，七成受訪者平均每餐製一碗廚餘，當中八成人話因為烹調過多，七成二人話因為過量購買。大家咪以為一碗廚餘濕濕碎呀，所謂集腋成裘，堆沙成塔，七成人個個每餐一碗，全港七百萬人就有四百九十萬碗。咁搞法，就算將維港做埋堆填區都唔掂o架。

每餐丟棄廚餘只係基本動作咋，過時過節嘅廚餘垃圾更加係鋪天蓋地。形容為鋪天蓋地，冇誇張o架，中秋節快到，環保組織調查發現，上年平均每家丟棄一點零六個月餅，推算全港總共丟棄二百五十萬個月餅，足以鋪滿整個香港嘅鐵路網！

所以話啫，前朝政府嘅環保工作真係相當垃圾，明知廚餘氾濫成災必然會演變成環境禍患，咁多年來有冇循循善誘教育市民呢？推動廚餘回收又有幾大進展呢？睇完呢兩個調查，答案已經一清二楚。

正如環保組織話齋，廚餘會產生沼氣，造成溫室效應嘅威脅比二氧化碳高廿二倍，嚴重危害地球環境。港產官僚對廚餘問題唔嗲唔吊，何止靠害港人，簡直靠害全人類。講到呢度，太一叮不期然諗起一種可以將廚餘轉化為肥料嘅回收機，大家不如買番幾個送畀班環保官僚，唔係畀佢哋做試驗，係畀佢哋自己捐入去以謝罪天下。

咁講啦，前環境局局長邱騰華已經成為官場剩餘物，調離環保政策總舵手嘅崗位，未來五年就睇黃錦星同陸恭蕙有冇本事收拾殘局嘞。聽講政府最快本月底前會公布廚餘回收方案，嗱，減廢由源頭做起，推動廚餘回收政策一樣o架咋，如果要成功，政策最高制訂者一定唔可以係廢物，黃局長同陸副局好自為之呀，叮！