政壇：政商定格：梁太惜資源廚餘做肥料

主張回收廚餘嘅特首CY梁振英，太太唐青儀亦全力響應。梁太尋日出席「世界清潔日」環保活動時，話同親友食飯時，一定會擺定幾個膠盒喺枱面，將預計有剩嘅食物先夾起，咁就唔會有人要食口水尾喇。佢又話同CY出街食飯一定唔會有嘢食剩，因為CY成日提住唔好叫咁多嘢食，夠食就得嘞！

原來梁太係環保團體綠色力量嘅名譽贊助人，一直都支持環保。佢話同CY身體力行，家中有一部廚餘機，就算有剩飯剩菜，都可以將廚餘倒入部機轉為肥料，咁就唔會浪費。

問到中秋節點慶祝，梁太話CY好鍾意食家鄉嘅山東月餅，月餅嘅餡唔係雙黃白蓮蓉，而係豆沙同欖仁，唔係個個鍾意食。活動中途有段小插曲，有同場嘉賓被問到點樣提醒老人家少送月餅，就幽默咁話「同佢哋洗腦囉」，逗得大家哈哈大笑，仲個個望向梁太，梁太就依舊笑容滿面，冇理會有乜弦外之音。