政壇：搞搞政：星爺串連功能議員新勢力

吳亮星重出政壇，當選金融界議員後，呢排已四圍搵志同道合好友加入尚未命名嘅新早餐派，佢尋日話進度非常唔錯，現已聯絡咗好多位功能組別議員，預計最多有成十位議員咁多。嘩，十席咪成為立法會第二大黨，僅次於第一大黨嘅建仔？

原來橫掃十席只係星爺嘅一個目標，但仲未成事嘅，據了解真係應承咗加入嘅暫時都係得三、四位議員。星爺話未來一星期會約見其他議員商討合作空間，因為多個朋友好過多個敵人。咁大聯盟改咩名好呢？佢話由於唔想有太綑綁嘅意味，所以新組織唔傾向用「派」、「黨」呢啲字眼，亦唔會有個「中」字，避免中資色彩過濃喎，又話聯盟成員都係嚟自工商界，估計都離唔開「工商」、「專業」呢啲字眼。

其中一位功能組別人士同我哋講，功能組別嚟個大整合當然好，同星爺合作亦唔係問題，但要放棄自己塊招牌而加入星爺個檔，機會就微乎其微，不如星爺等人加入已存在嘅「工商專業聯盟」，每星期舉行例會，大家傾吓投票取態，商討吓點樣同政府談判好過。