政壇：泛民超級議員有難

五位當選超級區議會嘅議員，每人手握二十幾萬選票，最高嗰位白鴿黨涂謹申更有三十一萬票，但做超級票王都唔慌有好日子過。講得好聽就係有二十幾三十萬市民授權支持，講得唔好聽就要向二十幾萬市民負責，而且槍打出頭鳥，立法會有乜事都要搵佢哋做箭靶。

上次變相「五區公投」喺建制派冷處理下唔太成功，普遍泛民見過鬼都怕黑。偏偏社民連「長毛」梁國雄尋日喺《城市論壇》建議，如果日後《基本法》第二十三條再度來臨，或者政改方案太離譜，三位泛民超級議員即白鴿黨鐵頭仁、阿涂同民協馮檢基，是但一個要立即辭職，藉補選搞多次變相公投。長毛話超級議員搞變相公投好方便，因為一辭職就要全港市民選多次，既有代表性，錢亦慳番唔少。

事實上呢三位超級議員真係搞公投最佳人選，但呢個問題將會困擾佢哋四年，因為三人歷盡千辛萬苦先贏到個議席，點會咁易玩辭職呀。一旦辭職公投只會進一步失去溫和支持者，但唔支持又畀人鬧冇膽，絕對係兩面不是人嘅困局，相信未來四年都會被公投支持者同反對者施壓，點會有好日子過。

白鴿認被選民懲罰

聽到長毛有個咁大膽建議，在場嘅公文袋「袋巾傑」梁家傑、白鴿黨「單雞」單仲偕都唔敢出聲附和，但有市民再向白鴿黨追問會唔會辭職搞變相公投，單雞惟有焗住回應話，部分選民喺今次選舉已經用選票嚟懲罰白鴿黨，白鴿黨會有深切檢討，年底換領導層時或者會有標誌性嘅轉變路向，叫市民耐心等待吓喎！