民生議題待落實 政客勿再搞搞震

緊張刺激嘅選戰風雲曲終人散，七十位新任立法會議員整裝待發，喺嚟緊嘅新立法年度，佢哋究竟會有乜嘢表現呢？嗱，先小人後君子，咁多位議員，唔該你哋生生性性，做啲正經事，洗甩「垃圾會」呢個污名，如果唔係，就算太一叮唔叮爆你哋，選民都唔會放過你哋！

政務司司長林鄭月娥早前去信全體候任議員，話有十項民生措施要等立法會撥款先可以落實，仲列明晒所有諮詢會期同埋政策時間表，希望各位議員可以爽手啲，等政府可以快啲落實。咦，似乎係政府見到上屆立法會亂糟糟，所以先此聲明。其實咁都啱嘅，依家講明先，到時如果有人搞搞震，阻延民生政策，就冇得再抵賴喇。

睇番上屆「垃圾會」，真係不堪入目o架。爆粗、掟蕉、掃枱、拉布、流會，無奇不有，而且仲係日以繼夜，夜以繼日，沒完沒了，浪費時間同納稅人金錢，搞到大量民生議題塞晒車，要留畀下屆執手尾。呢啲政客正經嘢唔做，一味譁眾取寵，阻撓施政，真係累人累物。

仲有吖，好似四大懶蟲咁，就算擺塊紙板喺度，都仲叫做有個樣睇吓，好過佢哋唔出席唔質詢唔動議，直情好似不存在咁。雖然今屆四大懶蟲已去其三，但仲有一條懶蟲自動當選o架，睇吓佢會唔會再創出席率新低啦。

不過講嚟講去，最令太一叮激氣嘅，都係嗰班助紂為虐嘅保皇黨。明知曾蔭權爵士貪盡海陸空，嗰班無恥政客仲要為貪官保駕護航，直情係是非不分，黑白顛倒喇。

立法會不務正業，唔怪得民調顯示五成市民不滿意，政客自己都覺得醜怪喇。嗱，今屆立會大換血，希望新人事新作風，可以帶來新氣象，省番靚塊招牌啦。不過，望係咁望，但做唔做到仲要睇過至知。

講開又講，前朝政府一事無成，立法會有破壞冇建設亦難辭其咎。新政府展示咗撥亂反正嘅決心，喺民生議題上，更加講明會「成熟一項，推一項」，做實事為市民。唔該立法會洗心革面，做番本分，唔好再搞搞震喇，叮！