SUN奇古怪：Sun潮語【抓撈】

立法會選戰塵埃落定，有人快活有人愁。雖然民主派得票多於建制派，但建制派議席竟然比民主派還要多，議會依然以親中建制派佔大多數。這種議席數目不反映民意取向嘅畸怪現象，真係香港獨有。當然呢啲亦歸功於建制朋友，同建制朋友嘅朋友配票策略出色所致。Anyways……怪只怪有人為保飯碗瘋狂告急。終於，撈咗多年立法會議員嘅民主鬥士，同一啲精忠勇悍愛國衞兵，都議席不保成為雙失中年，要下馬問前程，下崗搵工「抓撈」去也！

潮語「抓撈」意思係千方百計跪求工作嘅意思。

「抓」在廣東話有乞求嘅意思，喺你山窮水盡粒水無滴嘅時候，會去向親戚朋友「抓錢」，希望「抓」到一個幾毫，解燃眉之困。「撈」者，「做」也。「撈嘢」即是做嘢咁解，「撈」嘅工作多是比較低下或有點偏門。

例如俗語「撈家」係指社團巨子，「撈女」係指夜總會工作嘅女士等。所以「抓撈」就係當你冇嘢撈嘅時候，向啲有勢力人士或老細們，啲嘢做吓，長工固然好，散工都即做。

娛樂圈都相當盛行「抓撈」，因為娛樂界好多時都係以散工為主。由天王巨星，以至臨時演員燈光道具，工作都係斷Job計。做完一單未必有第二單，呢部戲有得撈，未必代表下部你擔正。所以，撈娛樂圈好多時都要埋堆「抓撈」，黐住老細跟大隊飲飲食食跟出跟入就梗，最慘係有時就算做晒契弟，都未必會「抓撈」成功。因為你以為你好契弟，有人比你更契弟！話明係「抓撈」，仲點可以扮性格巨星？衣食足然後知榮辱，有得撈，撈得掂，至有權扮型！好似一啲年輕嘅落選立會候選人，夢想都未達，就急於玩性格，漫漫長路……點撈呀？