政壇：星爺卿姐爭掌財會？
新一屆立法會議員產生後，多個重量級職位亦成為兵家必爭之地。泛民主派近年屢次喺立法會財務委員會「拉布」阻延撥款，建制派一直對出任財委會主席嘅白鴿黨劉慧卿表現好有意見，密謀派人搶番呢個位。據聞建制派近日正式出招，有人推舉金融界吳亮星（星爺）或自由黨張宇人硬撼卿姐，暫時以星爺嘅呼聲較高。
有心水清嘅人提醒，要慎防自由黨會因張宇人無緣代表建制派上陣鬥卿姐，倒戈相向支持卿姐，又或者該黨要張宇人落場同星爺爭位，變相分薄票源令卿姐漁人得利。而且歷年來都有建制游離票支持卿姐，因而令選舉存在好大變數。
此外，有最新消息指，經濟動力林健鋒同梁君彥兩個內會主席熱門人選中，以梁君彥較為佔先。至於林健鋒能否喺政圈再上一層樓，有傳要視乎經濟動力能否招攬更多獨立議員加入，但有冇人肯加入就係另一回事喇。