政壇：靳埭強享受自由靈感多
人生七十古來稀，今時今日或應該改為七十好創意。有「香港設計之父」之稱嘅靳埭強（靳叔）尋日就喺香港中央圖書館舉辦《靳埭強七十豐年展》。豐年展分為「墨化」、「脈化」同「物化」三個不同展覽，除咗靳叔展出四十多年來最多人欣賞嘅作品外，仲匯集三十五位來自港澳、內地同台灣嘅設計師作品同大家分享。
好多人話藝術家有脾氣，但靳叔囡囡靳民詩就話爸爸冇呢個問題，而且向來好開明。好似佢中三揀科，爸爸畀佢自由選擇，搞到佢喊咗出嚟。
靳叔當年繼承衣鉢做裁縫，後來轉做平面設計，佢覺得畀年輕人自由發展最好，好似佢到依家都仲有好多靈感，全因為能夠選擇自己鍾意做嘅嘢。與靳叔相識四十多年嘅設計師陳幼堅亦有捧場，佢覺得設計最重品質，唔會只跟客人意思隨波逐流。
靳埭強（右二）享受生活，太太（右一）及女兒（右三）一家對佢好支持。