政壇：泛民小學雞拒CY邀宴
新一屆立法會七十名議員選出之後，全城都關注呢班新貴嘅動向。特首梁振英好識做，決定聽日（星期一）設午宴招待佢哋，彼此打聲招呼、共商香港大事。雖然CY有心，但喺選舉中輸到木口木面嘅泛民主派卻一派小學雞反應，人民力量嗌杯葛，白鴿黨同公文袋耍手擰頭、明言不赴約，公文袋仲抽水話CY唔撤回國民教育科，所以拒絕赴宴喎！
新一屆立法會議員下個月十號上任，CY聽日喺政府總部嘅飯局，建制派議員已表明會出席，其實呢啲飯局立法會年中有幾次，係行政立法嘅另一種溝通，點知泛民主派因為選舉失利，刻意同CY劃清界線。
表現較務實嘅係工黨，雖然佢哋有人要去旅行，有人出席意欲不高，但最少都有張超雄做代表；至於社民連嘅長毛就話諗緊，如果去都會趁機請願。