政壇：環境局新人勝舊人

新政府日前公布咗陸恭蕙同李家超出任環境局同保安局副局長嘅消息，由泛民前立法局議員搖身一變為環境局副局長，陸恭蕙入仕零舍受關注。有環保學者尋日講到環境局嘅新人事安排時，坦言陸恭蕙同局長黃錦星一個精於空氣同水質，一個係環保建築專家，睇好呢對新拍檔，仲話環境局喺佢哋領導下一定有較佳表現。言下之意，即係睇好佢哋會較前朝嘅邱騰華同潘潔更勝一籌。又係嘅，邱騰華雖然有得留低，但就調咗去特首辦，潘潔更加影都冇埋，心照喇！

研究海洋廢物超過三十年、公開大學科技科學院院長何建宗尋日出席活動後，講到環境局新拍檔就話，佢哋兩個多年來喺各類型嘅環保議題都好活躍，亦有實事實幹嘅專業態度，佢力撐呢對新組合，都係睇好佢哋過去嘅專業、實幹態度，相信環境局有能力推出務實政策，一定唔會令市民失望喎。

講到兩人嘅長處，何教授更直言：「黃錦星有環保建築工作經驗，陸恭蕙做立法局議員嗰陣就主打空氣同水質問題，相信佢哋可以相輔相成，處理好空氣質素指標、廢物管理、焚化爐等重要議題。」

對於前任環境局嘅表現，何教授就好無奈話，上屆只係推出咗停車熄匙同膠袋徵稅兩個主要政策，對環保幫助唔算大，而且好多環保法例過晒時冇人理，的確仲有好大檢討空間。呢番說話，更清晰表達咗佢對邱騰華同潘潔任內嘅評價，環境係大家嘅事，希望環境局有新人事，更有新作風。