政治炸彈逐個爆 前朝靠害後人受

三姓家奴大家聽得多，有冇聽過「三姓當奴」？講嘅係英女王御封嘅過氣特首曾蔭權爵士，佢身在漢營心在曹，回歸之前姓「英」，回歸之後自稱姓「中」，但係人都知佢其實姓「貪」，貪遍省港澳、貪盡海陸空。落台後，呢位「三姓當奴」又再換上新姓氏，姓「害」──靠害新政府，靠害香港人。

呢，貪曾遺禍香江，連內地官方媒體《環球時報》都睇唔過眼，喺社評不點名批評佢推動國民教育計劃不善，應該為爭議負上最大責任。即係咁，係人都知推行德育及國民教育科係曾蔭權任內嘅主要教育政策之一，因為佢考慮不周、規劃不善、諮詢不足，最終引起輿論反彈，搞到滿城風雨，幾乎變成「小天安門事件」，新政府無辜成為替罪羔羊。

其實，內地官媒已經好客氣喇，貪曾在任七年一事無成，留低大量爛攤子同計時炸彈，亂政又點止國民教育一項？新界東北發展計劃、放寬內地來港個人遊、鼓勵就業交津計劃、雙非孕婦湧港產子、置安心計劃、前朝高官僭建等等，全部都係佢留低嘅蘇州屎，全部都要新政府出手收拾殘局，你話唔係靠害都冇人信啦，叮！

唉，貪曾禍港，路人皆見，北大人又點會唔知吖。據講，有關方面早前對佢下達「三不」禁令，一不准喺立法會選舉之前踏足香港，二不准與港府官員見面，三不准撰寫及出版回憶錄，目的就係要阻止佢再同既得利益集團及反對派勾勾搭搭，影響立法會選舉，阻撓新政府施政。

可惜吖，百足之蟲死而不僵，曾爵士居然將禁令當做耳邊風，繼續越洋操控搞搞震。由佢一手催生、「煲呔針」鄭經翰擔任台長嘅香港數碼廣播電台，不顧財政危機繼續廣播，日日喺度陰陽怪氣唱衰新政府。總而言之，貪曾不除，港難未已，政治炸彈爆完呢個到嗰個，新政府拆彈疲於奔命，根本無時間落實施政宏圖。

講到呢度，太一叮不禁懷疑，聲稱「打老虎」嘅廉政公署立案調查貪曾醜聞，點解到今時今日都未有下文嘅？都係毛澤東講得好，掃帚不到，灰塵照例不會自己跑掉。貪曾禍港死心不息，北大人落乜嘢禁令都係嘥氣，一於拎起除貪滅奸嘅鐵掃帚，將佢掃入垃圾堆，咁就冇得再靠害嘞，叮！