政壇：搞搞政：張華峰減磅穩坐立會位

新一屆立法會議員已選出，金融服務界換咗證券界重量級人物張華峰，佢嘅重量級唔止係業內地位，仲有身形。張華峰有個大肚腩，坐唔坐得落立法會個座位呢？甚至有人質疑佢使唔使另外訂造大座位呢﹖峰哥話唔使喇，仲透露因為選舉已減咗三十磅喎。

峰哥話，今次選舉在公在私都好開心，因為日日喺三十幾度高溫下拉票，有時連晏晝都冇時間食，選舉後成功瘦身，總共減咗三十磅，依家條腰只係得番四十二吋，行路時都輕鬆好多。佢仲自爆，好多朋友曾笑佢入立會嘅話要坐加大碼座位，佢都驚過o架，但減磅之後，呢個疑慮都一掃而空。

有立法會中人話，每個座位都好闊落，就算峰哥冇減肥都應該坐得落，至於點解計得咁準？原來有人衡量過，覺得張華峰同即將卸任嘅漁農界議員黃容根差唔多「分量」，如果根哥坐得落，峰哥冇理由唔得啩？不過，根哥嘅磅數同峰哥差咁遠，咁比較都唔太合理，睇怕峰哥都係親身試吓穩陣啲。