政壇：陪完謝票袁彌明速漂白
代表人民力量參加立法會新界東直選嘅袁彌明（Erica），雖然落選咗，但尋日仍然笑容滿面、陪同勝選嘅陳志全（慢必）落區謝票，Erica話嚟緊嘅大計係搵老公，條件係政治理念一定要同佢相同，早前四出拉票搞到皮膚曬黑咗嘅Erica仲急速訂咗「漂白」美容療程，一於還原靚靚先。
慢必公開咗同志身份，Erica就話佢哋一早就知，以前有人見慢必施展「蘭花手」，都有問過佢呢個問題。講番佢同慢必組「情侶檔」拉票，Erica就呻同慢必一齊工作「好冇趣」，「一齊拉票做嘢幾個月，但係佢眼尾都唔望吓我！」
今次選舉人民力量嘅成績都算唔錯，Erica話佢會同主席劉嘉鴻、慢必、「星屑醫生」歐陽英傑夫婦，計劃去泰國旅行慶祝。待嫁心切嘅Erica唔知會唔會有艷遇呢？
袁彌明為選舉拉票搞到皮膚黑咗，依家要急急去做「漂白」美容療程。