政壇：黃洋達搣甩人力標籤

政壇風雲萬變，一日可以發生好多嘢。立法會選舉結果公布後翌日，今屆選舉中一個焦點、打正人民力量旗號出選嘅九龍東候選人黃洋達已經撇清同人力嘅關係，佢喺網上回覆市民查詢時，強調自己支持嘅係人力嘅黃毓民，而唔係人民力量喎。好彩佢無當選，否則投咗票畀佢嘅人力支持者，都唔知點同佢算帳！

選舉之後，各大政團都為未來發展作新部署，有市民喺facebook問黃洋達，熱血公民喺選舉過後仲算唔算係人民力量呢？黃洋達就答話，呢件事要再同毓民傾，因為佢個人立場而言，根本唔支持人民力量喎，自己最多只係毓民「教徒」。佢喺選舉期間打正人力嘅旗號出選，選後兩日就拿拿聲搣甩人力嘅色彩，投咗票畀佢嘅人會唔會覺得被背棄呢？佢嘅「教主」毓民總結人力成績時，都用人力嘅新秀嚟形容黃洋達，依家到底係黃洋達過橋抽板？定係毓民會錯意呢？想當初黃洋達喺出獄活動上，獲大批人力支持者撐場，估唔到選後兩日就形勢逆轉，諷刺味十足。

好多網民睇唔過眼

有網民尋日仲話，黃洋達同「慢必」可以合作，一個喺立法會、一個喺會外裏應外合，佢嘅回應係斬釘截鐵嘅「才不會！」閂上同慢必陳志全嘅合作之門。其實，黃選舉失敗、喺政壇只係白丁一名，同入咗立法會嘅慢必唔係同一層面，合作之說似乎遙遠咗啲，但黃洋達一口拒絕反令人關注人力到底發生乜事。

好多網民都睇唔過眼，話既然黃洋達咁唔支持人力，應該一早出聲，唔好輸咗先講埋呢啲嘢。我哋諗住問黃洋達點解會咁講，但打咗幾次電話畀佢都無人聽。