SUN微博：打橫嚟講：配票大過天

今屆立法會選舉，塵埃落定，誰在飲泣，誰在偷笑，再不重要，一切已成定局，將來係點，只得認命吧！

競選期間的大小論壇，喧嘩胡鬧，盡是小丑跳樑雜耍，如大笪地賣武，貌似好睇，實無內涵，看着一兩個嚴謹認真講理念，說政綱的候選人，叫人替他們難過，更不幸者，這類稀有動物，大多落選，好彩，仲有幾件能苦戰慘勝，保住香港選舉顏面，否則，又畀內地同胞瘀死，話有得食咪好囉！搞乜春公平公正的鬼把戲吖！你班港燦真幼稚，天朝監管下，會有真民主選舉？哈哈！

好嘞！新一屆立法會議員當選名單中，你能噏得出是但一件的政綱嗎？老老實實，佢哋係邊位，都未搞清楚呢！從得票比例看到，勝敗的原因，不在往績，而係睇配票，誰有能力大量動員，先種票，後精算，計數準，出手快，勢力愈大，贏面愈大。

「配票」，再不是十惡不赦的劣行，已是理所當然的爭勝策略、取勝技巧。民建聯的李慧琼贏得一席後，向記者說佢之成功，全靠「配票」得宜，唉！這令我想起現今香港教育大零落，最受惠的，係那些發過豬頭的「補習天王」，主因是教育不再是傳知識，學生們為求考試分數高，要去跟那些所謂天王，學的，是「考試技巧」，攞分的策略！

當社會的核心價值，證明成功不是在做實務，而係諗計耍手段，我就真係睇唔出有乜好嘢會出現囉！只能自求多福，算罷了！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

就係敢爆

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot