政壇：政商定格：鄧鉅明部署囝囝接班
太子珠寶鐘錶早前贊助舉辦「詩歌瑰麗名錶夜」，展出十二個國際頂級品牌嘅限量版珍藏腕錶同稀世傑作，吸引城中名人到場。主席鄧鉅明、鄧太兼執董鄧宣宏雁、執董朱繼陶同太太朱鄧麗萍傾巢而出，同場仲發現鄧家長子Alan鄧亦軒。原來Alan最近榮升董事，象徵太子珠寶第二代終於浮出水面，部署接班。
身為80後嘅Alan樣貌睇落仲好似大學生，但原來已經大學畢業，仲返公司幫手已有六、七年添，真係睇唔出。風趣嘅鄧鉅明有子萬事足，笑稱Alan係「太子嘅太子」，勁讚囝囝好乖，工作出色，仲話公司仍然係初生嬰兒，大把江山有待囝囝去開創。
鄧亦軒（左）溫文有禮，爸爸鄧鉅明（右）同媽咪（中）猛讚佢乖。