政壇：政商定格：鏞記公主推美酒佳餚宴
鏞記酒家為慶祝七十周年，本月中將首次推出美酒配佳餚菜單，鏞記創辦人甘穗煇次子甘琨禮嘅掌上明珠Yvonne甘蕎因，日前罕有現身推介，仲話鏞記八樓嘅私人粵菜會所「嚐真」推出嘅美酒佳餚尊貴菜單，饒富香港風情嘅菜式名稱，就係出自大伯甘健成之手。
今次菜式梗唔少得傳承七十年嘅金牌燒鵝，仲有禮雲琵琶蝦、花膠雞絲羹等經典美食，套餐更搭配法國頂級酒莊Mas de Daumas Gassac出品嘅葡萄酒。Yvonne自細唔憂食，要數最鍾意嘅菜式，莫過於唔喺菜單上嘅「咖喱牛崧炒飯」，佢話呢味炒飯曾喺今年春季短暫擺上菜單，食過嘅朋友都讚好。當日佢仲臨時叫廚房攞出爺爺生前獨享嘅腐乳，同大家分甘同味，由於當年廚師專為爺爺而醃製，所以腐乳有個花名叫做「董事長」喎！
甘蕎因（右）現身省靚鏞記招牌，大亞洋酒靚女經理Louisa（左）都嚟一試為快。