政壇：怪醫三喜臨門

立法會選舉塵埃落定，「怪醫」梁家騮以四千幾票成功連任醫學界功能界別議員，正想恭喜佢時，點知原來佢仲喜上加喜。咦！唔係喎，係三喜臨門先至啱，因為佢太太Cannas今年二月誕下龍仔後，依家又佗緊一對孖女，已經五個月喇，預產期明年一月，趕得切成為小龍女，令梁家足足有三條龍，真係龍咁威。怪醫話已經請咗兩個外傭，遲啲再請多兩個陪月，等老婆冇咁辛苦喎。

怪醫參選期間，Cannas已經有咗，粗身大勢仲不停幫老公助選，前晚仲通宵喺點票站添！不過，Cannas覺得佗孖胎都幾辛苦，又好易攰，要坐多啲，所以等到尋日朝早七點，未點完票都要返屋企休息。佢話冇諗過會生幾多個細路，只係一心諗住自己年紀都唔細，早啲生完就早啲收工，專心湊細路。今次佗孖胎，仲係同卵雙胞胎，即係兩姊妹個樣幾乎一模一樣，而且兩公婆都冇生孖胎家族史，難怪Cannas話今次真係意外中嘅意外，遲啲仲要諗吓等對孖女出世後，點樣認出邊個係大孖、邊個係細孖。

唔使同雙非爭床位

奶粉、紙尿片同衫仔褲仔都要打孖嚟，怪醫今次都幾重皮噃，但Cannas話唔怕要同內地人搶奶粉，而兩個囡囡明年一月出世，啱啱好政府實施「零雙非」，佢唔使同雙非孕婦爭床位，醫院產科床位會鬆動啲，喺私家醫院生都舒服啲。

怪醫以前成日話仔細老婆嫩，要捱到七、八十歲，遲啲再多兩名家庭成員，睇嚟佢都幾難退休，仲要勤力啲做嘢。佢話診所生意維持得到就冇問題。