人云亦云反國教 誰來關心校巴荒

抽水政客最叻無事生非，搞風搞雨，一句「保護孩子」，就將國民教育搞到翻天覆地滿城風雨，但係學生實實在在面對嘅校巴荒以及上學安全問題，就唔見有人關心，真係本末倒置！

沙田一名小五男童日前返學居然遭校巴拒載，被迫淪為流落街頭嘅人海孤雛。件事係咁嘅，校巴司機以學童家長冇交錢及校巴滿載為由，畀四蚊男童叫佢轉搭巴士返學，結果男童搭錯車迷路，如果唔係善心路人搭救，都唔知會有乜嘢後果，難怪家長怒轟校巴公司罔顧學童安全，要求當局徹查事件。

校巴將學童遺棄街頭，等如危害學童安全，徹查事件固然係必須啦，不過，有樣嘢更加值得深究，點解校巴公司會將財神爺拒諸門外呢？答案就係，校巴服務近年供不應求，根本唔憂做！

唔講唔知，由於訪港旅客年年增加，校巴公司紛紛轉型做利潤較高嘅旅客生意，校巴買少見少，短缺問題早已敲響警鐘。有數得計，小學學生人數近年不斷上升，但係全港登記校巴數目反而劇減二百幾部，預計今年至少有一成學童無校車坐，你話有乜法子唔拒載吖。

即係咁，校巴有冇玩亡命飛車唔敢講，但係講到超載呢家嘢咯喎，已經日日喺馬路上演。本報日前獨家直擊校巴嘅「上客」情況，小學生上吓一個又一個，十六座小巴居然上咗廿六個小學生，問你服未。原來校巴內有乾坤，車廂早已大變身，將左單邊座位改放一張長木椅，於是一個個小學生變晒沙甸魚。仲有吖，有啲保母車居然喺車尾太平門前面加多咗一個座位，無中生有，變咗一架僭建校巴。

叮你個鎯鎯，前朝政府執法不嚴，敷衍塞責，搞到僭建村屋遍地開花，萬一僭建校巴又氾濫成災，咁香港咪周街計時炸彈？內地校巴成日因為超載而釀成慘劇，死傷枕藉，唔通香港要重蹈覆轍？唔該當局快快撥亂反正，如果唔係，一旦釀成大禍，呢隻鑊你哋孭唔起o架！

各位政客，如果你哋真心關心學生，唔好淨係掛住做政治騷嘞，督促當局諗辦法解決校巴荒，拆除呢個威脅學生安全嘅計時炸彈仲好啦，叮！