政壇：政商定格：湯修齊舉家復仇者上身
博愛醫院前主席兼皇后洋行董事總經理Henry湯修齊，喺暑假期間舉家暢遊美國。鍾意扮嘢嘅佢喺荷里活買咗超級英雄電影《復仇者聯盟》中嘅角色戲服，同太太Yvonne及一對仔女着上街遊玩，期間同專業演員扮演嘅蝙蝠俠同小丑等人物狹路相逢，簡直係玩轉荷里活。
Yvonne笑稱，外籍人士猛讚Henry係好爸爸，瞓身陪仔女玩，查實係仔女陪爸爸玩就真。Henry扮電影中嘅雷神，囝囝Harris同囡囡Athena就扮演美國隊長，太太梗係扮美國隊長之母啦！咁搞鬼嘅戲服，着一次又點過癮呢？所以Henry話下月萬聖節佢哋將再次變身，到蘭桂坊與市民齊扮嘢狂歡。Henry咁有童真，同家族做玩具生意不無關係，最近佢仲成功取得美國芭比娃娃配飾嘅中國代理權添！
湯修齊（右一）、囡囡Athena（右二）、囝囝Harris（左二）扮嘢上街，同蝙蝠俠、小丑狹路相逢。（受訪者提供）