政壇：搞搞政：「訪談」鳳姐白鴿仔復出快閃

有關立會選舉嘅採訪、告急通知短訊尋日滿天飛，其中白鴿黨九龍西嘅一個採訪通知短訊，下款寫咗個熟悉嘅名字，令好多人見到都打個突：「唔通係嗰個家偉？」無錯！呢個「家偉」就係舊年喺尖沙咀香檳大廈自掏腰包同鳳姐「訪談」，但之後搞到要辭去白鴿黨總幹事一職嘅陳家偉。

「訪談」主角陳家偉已經潛咗水一排，選舉先嚟復出，真係勇氣可嘉！白鴿黨張文光就話今次陳家偉只係幫佢哋安排吓行程，並唔係做前線工作。佢又話每個人都會犯錯，相信香港人都好寬容，咁人哋都係熱心幫手啫！陳家偉就話今次只係以義工身份幫吓手，得閒送吓水、送吓貨，同埋喺周邊睇吓咁。但當我哋去到採訪現場，諗住同陳家偉訪談吓嘅時候，佢已經唔知走咗去邊？所以話呢，陳家偉真係跑得好快㗎！唔怪得佢當日被撞破「訪談」後，可以飛奔落四層樓跑出大廈，追到記者索晒氣喇！