政壇：黃家和有機耕種田園蕪

餐飲聯業協會會長Simon黃家和喺上水古洞北嘅「慈康農圃」，月前被地主收回唔再續租，六月尾正式結業，佢慨嘆十五年來花逾千萬元配合政府推動有機耕種，到頭來變成一場空夢。

Simon日前喺社交網站facebook上載一張重遊農場嘅相片，感慨原來打理得井井有條嘅農田已長滿雜草。佔地五十萬平方呎嘅「慈康農圃」係佢嘅心血，經營首五年，年蝕逾百萬元，近幾年先掌握到耕種竅門，種出甜美有機蔬菜及瓜果。但估唔到近年發展商四出收地，優質農地由八年前每呎一百元，升至近年五、六百元，吸引地主們趁高價沽出農地，佢惟有走去清遠、山東搵農地。

聽聞唔少有機耕種戶都面臨迫遷問題，佢曾就此向特首CY梁振英反映，可惜香港土地供應有限，CY都嘆無能為力。但種瓜菜係CY嘅嗜好，就算他日遷入禮賓府，都會考慮闢出一角做菜園喎！