政壇：三個靚太中環輪住掃貨

早幾日喺中環遇到大新銀行主席王守業夫人，孭住個大購物袋嘅佢話之前坐郵輪暢遊克羅地亞等地方，玩咗十幾日至返港。佢話雖然當地天氣好熱，但因為佢老公一年先至放一次長假，所以有老公陪住已甘之如飴。跟住又喺附近商場見到民政事務局前局長何志平嘅太太胡慧中，當時佢已掃完一輪貨，跟住就會合喺門口等佢嘅傭工，然後一齊推住一大車超市物品到地下登上座駕離開。

講開買嘢，聯賢慧社副主席Michelle鄭詩韻嘅一對寶貝仔只得幾歲，雖然佢有個好老公幫手湊仔，但購買囝囝嘅日用品，佢絕對唔會假手於人。有日就見佢抽住三大袋嬰兒用品喺雲咸街等車，見司機一到，佢即刻好肉緊指手畫腳吩咐司機將三袋用品擺放好，先安心再去對開嘅時裝店再掃貨。Michelle話依家幾忙都好，每個星期五晚一定留番同老公拍吓拖，佢仲話老公見佢唔肯做少奶奶，感覺好心痛，惟有勤啲打電話提自己記得食飯喎！