政壇：貪曾難作反

立法會選舉尋日投票，選戰緊湊，但港島半山高主教書院票站，今年再見唔到往年依起棚牙投票做騷嘅「超貪選民」曾蔭權爵士，點解？咪因為佢任內爆出連串貪腐醜聞，又喺三月特首選舉期間搞小動作，有關方面早下達「三不」命令，其中一「不」就係要佢喺投票日之前唔准踏足香港，費事又再搞風搞雨。其實貪曾醜聞纏身，仲邊有顏面做港人行使投票權利吖！

貪曾七一執包袱後，旋即同老婆曾鮑笑薇離港外遊，行蹤神秘。七月初有人見到佢哋喺加拿大出現，雖然之後亦曾傳出有人見到佢，但到八月上旬後，已經冇人再見到佢，就連天主教堂都再冇佢嘅蹤影。但根據過去經驗，貪曾無論幾冇面見人、幾唔得閒，每逢選舉投票日佢都會同老婆去高主教書院票站投票，但尋日投票日就唔見佢哋現身行使公民嘅投票權利。

防「搞搞震」節外生枝

記得舊年十一月區議會選舉，貪曾去高主教書院票站投票時遇到社民連同四五行動嘅成員到場示威，仲嘗試遠距離向佢掟棉花糖，諷刺佢份施政報告嘅派糖措施「輕飄飄」，起初搞到貪曾面黑黑，但又隨即變臉強裝微笑，向示威者揮手。貪曾一向唔知醜，如果佢有得投票，又點會怕醜唔見人呢？

查實貪曾係身不由己，有消息話貪曾喺年初特首選舉明撐唐唐，背後係有一股龐大勢力兼涉及龐大利益，而尋日立法會選舉嘅結果係特區政府能否有效施政嘅重大關鍵，為免節外生枝，有關方面要貪曾喺選舉前禁足香港，連接觸香港官員都唔准，防範佢「搞搞震」影響選舉結果。

「三不」命令仲禁止貪曾撰寫回憶錄或自傳，杜絕佢藉此發揮影響力。由於佢在任期間貪盡海陸空，廉政公署仍在調查當中，如果佢違反禁令嘅話，執法機關分分鐘隨時採取行動，佢又點敢唔聽話吖，所以「三不」命令就如緊箍咒咁勒緊佢，想作反都難呀！