工廈變住房 民生無小事

估吓一個樓底高、環境好、交通方便仲要裝修有品味嘅單位，屋主會係咩人？富商？唔係；高官？都唔係。嗱，開估嘞，個嗰可能就係你！

無呃你o架。事關政府啱啱提出，將工廈改建成過渡性住房，用嚟出租增加房屋供應。嗱，其實呢條橋喺一啲先進歐美城市，好似倫敦咁，已經行咗好耐，仲好成功添。試諗吓，多數工廈都樓底高，可塑性高，可以畀住客發揮創意建造自己嘅安樂窩。加上工廈比起一般住宅平得多，梗係大受歡迎啦。仲有吖，全港大約有一千四百幢工廈，其中大約七百幢都係喺交通方便嘅地區，對於要返工返學嘅市民嚟講更加吸引。呢，好似觀塘區咁吖，如果租住工廈嘅話，價錢比起同區屋苑足足平四成，真係有得諗o架。

太一叮成日都話，要解決住屋問題，就唔可以用遠水嚟救近火，依家政府終於提出啲即時到位嘅政策，睇嚟佢哋終於明白呢一點嘞。即係咁，靠撥出土地興建樓宇，至少都要五年時間先可以投入市場，但係改裝工廈嘅話，兩年內已經可以有成果，算係可以暫解燃眉之急。一嚟市民可以有更多住屋選擇、二嚟工廈變住宅，業主賺取更多利潤、三嚟可以盡用一啲本身空置咗嘅工廈，簡直就係三贏局面，百利而無一害。

咁講啦，依家政府對於房屋政策，算係行啱咗第一步。所謂樓價高企，從來都係供求問題。點解前朝曾蔭權政府一直對樓市熾熱無晒計吖？咪就因為佢唔肯增加供應囉。曾蔭權之前牙斬斬話每年推出兩萬個私人樓宇單位，點知今年前七個月得二千幾個單位落成，供不應求，樓價唔升都難啦！叮！淨係活化工廈咋，呢條貪曾都已經講咗幾年，聽都聽到悶啦！嗱，依家新政府總算顯示出撥亂反正嘅決心，實實在在做嘢增加供應，咁樓價先真正有望走回正軌o架嘛！

好似之前嘅「梁十招」同埋「港人港地」咁吖，都係實際針對樓市過熱而提出嘅政策。「梁十招」公布之後，上周嘅成交量已經下降百分之四十，算係略有小成。至於「港人港地」就更加啱晒香港人胃口，規定三十年內只可以轉讓畀香港永久居民，應該可以起到抑壓炒風嘅作用。

新政府能夠貫徹「民生無小事」嘅理念，當然係好事。不過樓市難料，加上依家香港事事政治化嘅歪風，無論政府提出咩政策，都一定會有反對聲音o架嘞。香港能唔能夠解決樓市問題，就睇政府可唔可以擇善固執嘞。