政壇：人大撞立會雙料議員頻撲
三十六名港區全國人大代表每年都會定期到內地訪問考察，今年適逢多名人大代表參選立法會，人大考察團惟有押後遷就。據聞最近有咗最後決定，改喺下月十一日起一連多日訪問雲南，點知呢個訪問日期原來又同新一屆立法會定於十月十日復會撞期，由於復會初期要選舉小組主席，特首梁振英又會喺下月十七日出席立法會會議簡介工作。據聞，已有身兼人大兼立法會議員兩職者打算到時做「空中飛人」，兼顧兩地事務。人大代表選舉年底就舉行，據聞現任港區人大當中，至少有八人因年齡問題放棄連任。而三名已自動當選立法會議員嘅人大代表吳亮星、廖長江等已有共識，佢哋先隨隊考察幾日，然後返港參加新立會工作，之後可能再飛雲南歸隊。至於體育、演藝、文化及出版界候選人馬逢國、工聯會九龍東候選人黃國健如果當選，點樣兼顧就到時再算。