政壇：大舊乖女加國遙距打氣
立法會新界西候選人陳偉業（大舊）近排忙選戰，尋日佢喺社交網站上載一張有三位加拿大美少女嘅全身照，中間嗰個更係佢喺加拿大讀書嘅二女Vanessa。Vanessa留言話佢同一班朋友喺香港成長，雖然身處異鄉，但佢哋深信香港應該有一個充滿希望、民主自由同人權嘅將來，所以一齊着住大舊嘅助選團戰衣，呼籲選民投票畀人民力量候選人。大舊話Vanessa依家喺溫哥華嘅大學讀緊會計，佢只係間唔中同個女講吓啲選舉嘢，估唔到囡囡記得咁清楚。有咁多美少女幫佢遙距打氣，大舊話好鼓舞，大讚囡囡令佢老懷安慰。