一簽多行擱置 香港輸打贏要

「瞎折騰」嘅意思即係無情白事攞嚟搞，呢家嘢以前內地最叻，依家香港唔止玩得出神入化，仲青出於藍添。

內地放寬個人遊措施突然踩「迫力」，無限期擱置。特首梁振英話，已經同內地達成共識，要確定本港嘅接待同承受能力之後至實施非深圳戶籍居民「一簽多行」措施；佢仲話內地會繼續有序簽發六個城市非戶籍居民來港個人遊簽注，但只會「一簽一行」或「一簽二行」。

遊香港變夢香江，中空寶係人都失望喇。有內地同胞不滿一簽多行話變就變，希望當局盡快搞番掂。其實，唔止內地人失望，財神爺接唔到，本港零售及餐飲業人士亦感到失望。

話時話吖，香港愈來愈政治化，社會愈來愈反智，直情好似食錯藥咁，乜都反對，「一簽多行」話就話暫時擱置，其實可能壽終正寢就真。

為吸引中國旅客，全球各地出盡法寶，香港背靠祖國，得天獨厚，好多地方簡直恨都恨唔到。點知自吹「旅遊之都」、「購物天堂」嘅香港，居然嫌旅客太多，將財神爺拒於門外，問你服未！

無計喇，香港妖孽作祟，為咗選票同不可告人嘅政治目的，無良政客同反中亂港淫媒煽風點火，「一簽多行」嘅負面影響被無限放大變成政治議題，甚至被視為洪水猛獸。話時話，此處不留人，自有留人處，內地同胞唔嚟香港，驚佢哋有錢無碇使咩，最終咪又係港人受害。

一簽多行本來係惠港措施，弊在曾蔭權政府收咗中央大禮之後，配套措施乜都冇做，搞到新政府踢晒腳，分明靠害啫。一下子多咗上千萬同胞隨時殺到，香港面對唔小壓力，有人擔心逼爆香港，都唔係冇理由嘅，要怪就怪貪曾一事無成。

追本溯源，○三年受沙士疫情衝擊，香港經濟奄奄一息，失業率創下回歸後新高，中央政府及時推出個人遊措施，為本港經濟復甦打咗支強心針。近十年來，內地訪港人數累積近八千萬人次，為本港帶來近三千五百億元直接旅遊收入，可以話，香港經濟得以持續發展，個人遊功不可沒。

有事鍾無艷，無事夏迎春。香港人輸打贏要，放寬個人遊被妖化，港人喺同胞眼中淪為白鴿眼勢利小人，試問呢班政客淫媒，攪亂香港對你哋究竟有乜好處？