政壇：政商定格：專業精英組聯盟扶後輩

金至尊數碼行政總裁Johnny吳傑莊最近同一班不同行業嘅老友，發起成立「青年專業聯盟」（YPA），集合會計、金融服務、法律、資訊科技及建築、測量及都市規劃五個界別嘅力量，培育下一代進身專業之路，而YPA成立只有半個月，已經招募咗二百五十個會員。

Johnny話聯盟內呢幾個行業環環相扣，好似一間IT公司要上市，就要搵律師同會計師幫手，融資又要搵金融業人士。今次佢搵嚟識咗十幾年嘅老友，好似法律界Joseph周紹榮、會計界Roy盧華基等，都係喺業界打滾多年。Roy話中港兩地合作好重要，希望借用YPA呢個平台，返內地找尋合作機遇。

開律師行嘅Joseph就話鍾意向高難度挑戰，積極拓展版權商標生意同家族企業資產保護嘅項目，即係防止家族爭產。近年家族爭產案湧現，唔少富豪四十幾歲已經做定資產保護，令佢明白到家庭和諧比金錢重要。