政壇:葉澍堃四川探訪煮靚菜

每年都號召城中名人到內地探訪農戶嘅國際小母牛香港分會,早前到汶川地震災區四川廣源探訪,小母牛董事Stephen葉澍堃、有「快勞夾大王」外號嘅籌委會主席杜振源一家、佳能高級副總裁鄧慶治父子、Sony Computer Entertainment香港公司董事James項明生等人亦有同行。

今次行程四日三夜,共探訪兩條村莊。回想四年前地震後災區一片頹垣敗瓦,Stephen依然歷歷在目,轉眼災區重建得好好,農戶亦都有自己嘅牲畜同農作物,仲開始秉承小母牛精神,將牲畜轉送其他有需要嘅人。

去到方圓十里都冇餐廳嘅農村,無大廚坐鎮,嘴刁嘅Stephen一樣有好嘢食,事關大家捲起衫袖落菜田採摘當造蔬菜,然後埋鍋自己炒,爽脆嘅豆角,清甜嘅粟米、水嫩嘅豆腐,勝過山珍海味多多聲,加上全村百幾人一齊同枱食飯,場面都幾壯觀。James係四川人,今次返鄉下別有一番滋味,佢識講當地方言,所以全程充當翻譯,氹得公公婆婆好開心。

第一手消息請下載on.cc東方互動iPhone/iPad/Android/Windows Phone Apps

葉澍堃到內地探訪農戶,親自下廚煮幾味。