政壇：打油詩揭示建制邊緣人

聽日就係立法會選舉投票日，逾三百萬選民都手握兩票，除咗可以喺直選選區投票外，仲可以喺被喻為超級區議會選舉中投票。之不過臨近投票日，無論泛民主派或建制派嘅候選人都大打告急牌，究竟邊啲先係真告急？

為咗搶票泛民累鬥累，咁建制派最終係咪可以協調到，避免互拉後腿拖累選情，咁就要睇班支持者識唔識得自行配票。尋日忽然流傳一首用候選人名稱創作嘅打油詩。

票源分配唔勻

首打油詩係咁嘅：「九月九日早起床，齊齊投票撐香港。東九起動超人俊，西九繽紛美芬香。新東航海確珮帆，新西回航心志祥。港島安定國興旺，超級保護海瓊皇。我等親朋齊參與，香港繁榮享安康！」寥寥幾十字，已經暗示出建制派各區嘅重要候選人名字，包括九龍東直選嘅謝偉俊、九龍西嘅梁美芬、新界東嘅葛珮帆、新界西嘅梁志祥、香港島嘅王國興同超級區議會嘅候選人李慧琼喇！

建制派票源分配唔勻，令到唔少原本以為可當選嘅候選人變得危危乎，呢首打油詩準確無誤咁道出各區出局邊緣建制派候選人嘅姓名同處境，相信明眼人一睇就知講緊邊個。由於呢首詩近日不斷喺建制派圈中流傳，有政界中人就打趣話，呢個可能就係建制派要保證當選嘅名單都唔定喎！

香港島嘅候選名單則有曾鈺成、鍾樹根、葉劉淑儀、劉健儀、單仲偕、陳家洛、劉嘉鴻、何秀蘭、吳文遠、勞永樂、許清安、吳榮春同何家泰名單。新界西嘅候選名單有李永達、譚耀宗、陳恒鑌、郭家麒、麥美娟、麥業成、田北辰、梁耀忠、陳樹英、陳強、陳偉業、李卓人、曾健成、何君堯同陳一華。

九龍西參選名單包括黃以謙、黃碧雲、譚國僑、黃逸旭、蔣麗芸、黃毓民、林依麗同毛孟靜。九龍東嘅參選名單有梁家傑、黃國健、陶君行、嚴鳳至、胡志偉、陳鑑林、黃洋達同譚香文。