大學宿位難求 教育產業吹牛

做人難，做香港人更難，難在居不易也。嗱，咪以為無殼蝸牛先至有居住難題呀，就算仲未踏入社會嘅大學生，一樣要為宿位而憂吖，叮！

話說香港大學原定興建四座新宿舍，供一千八百名學生入住，但早前校方宣布，其中兩幢宿舍工程延誤，要延至本月中至十月先能夠入伙。本來呢，只係兩幢宿舍延誤，有一半學生覓得歸宿都好過全部學生流離失所，點知屋漏偏逢連夜雨，另外兩幢完工嘅宿舍居然驗出甲醛超標，入伙日期要押後，搞到最少有八百名內地及海外學生大失預算。

雖然話，今次港大新宿舍甩轆純屬意外，而且影響唔算嚴重，但係事件清楚反映咗一個大專教育嘅深層次問題，就係本地大學為咗開拓財源而不斷增收外地學生，而學生宿舍就長期短缺，一個唔覺意隨時搞到校園之內遍地難胞，咁就丟晒架喇。

大家仲記唔記得，中文大學本來興建五間新書院，總共提供二千四百個學生宿位，點不知其中兩間書院又係延誤落成，宿位即時僧多粥少，搞到學生被迫「屈蛇」，二人房擺三張床，三人房變咗四個人瞓，大學宿舍瀰漫劏房味道。港大、中大係本土兩間龍頭大學，爭學術排名一向鬥到難分難解，估唔到喺宿位問題上亦成為一對難兄難弟。大家話嘞，大學生面對嘅缺宅難題，係咪同蝸居一族一樣咁頭痛吖？

最好笑嘅係，前朝曾蔭權政府吹水唔抹嘴，口口聲聲發展教育產業，又話要將香港打造成區域教育樞紐，但係大學宿舍長期供不應求，搞到學生哥連搵個安安樂樂瞓覺嘅地方都無，仲講乜嘢教育產業呀？被人剷到飛起就有，叮！

有人話，大學係社會嘅縮影，家陣嘅大學生未入社會已經嘗盡無殼蝸牛嘅滋味，情何以堪。唉，貪曾在位七年，一味視民望如浮雲，成日傍實富豪黐飲黐食，醉心於玩曾商勾結遊戲，對民生大事闊佬懶理，搞到基層家庭要搵個安樂窩難過登天，連大學宿舍亦一位難求。唔怪得家陣嘅青少年咁大怨氣，郁吓就話上街，郁吓就話絕食，貪曾真係好帶挈咯！

一句講晒，大學宿位難求，教育產業吹牛。安居樂業呢句話對打工仔重要，對大學生一樣咁重要，試諗吓，連安身嘅竇口都欠缺，又點樣要求佢哋好好學習呢？所以咯喎，麻煩新政府快啲諗計，唔好搞到教育產業半天吊，學生望天打卦，叮！