貪曾房策遺禍大 舊區重建要加快

住屋問題一直係香港人嘅噩夢，嗱，劏房住客固然提心吊膽，驚一個唔覺意變咗火海燒豬，就算其他租客，睇住樓價失控飆升，一樣嚇到目瞪口呆。梗係啦，好多人都驚成世買唔到樓o架嘛，上半生係一隻無拘無束嘅無腳雀仔，下半生焗住做一隻蝸居陋室嘅無殼蝸牛，唔係人人接受得到。

點解香港人咁可憐，想搵一片遮頭之瓦啫，搞到又驚變做火海燒豬，又怕焗做無殼蝸牛？無法子，鬼叫大家遇上一個「痛心特首」咩！

曾蔭權在位七年，大家見佢最關注嘅房屋問題，就係部署自己退休之後入住深圳禮賓府，同埋佢間半山祖屋點樣僭建得更大更見使。全港七百萬人嘅住屋問題？佢話之你，有時間都傍實富豪上天落海歎世界啦，叮！

好彩，貪曾滾蛋落台，新政府登場，日久失修嘅房屋政策終於可望撥亂反正。嗱，繼紓緩樓價「梁十招」之後，當局又有房策新消息。市建局位於深水埗嘅首個「需求主導」重建項目取得突破，超過八成業主同意將物業出售，估計可重建成七十個中小型單位。

乜嘢係需求主導呢？簡單嚟講，即係小業主可以主動向市建局提出收購佢哋幢大廈，只要八成業主首肯就達成交易。嗱嗱嗱，呢種新式市建招數有得諗o架，俗語話，男追女，隔重山，女追男，隔層紗；收購物業都一樣o架咋，當局求小業主難，小業主求當局易。如果舊區入面茸茸爛爛、歪歪斜斜嘅殘破舊樓真係因而得到加快清拆重建，至少一舉三得：改善市容、改善樓宇安全同埋增加房屋單位供應。所以話，呢個市建新趨勢對紓緩樓宇短缺嘅貪曾遺禍，不失為其中一服妙藥。

之不過咁，重建項目有咗需求主導新招數，係咪就足夠呢？梗係未夠啦，舊區重建能夠增加單位供應，方向無錯係正確，但係步伐亦要加快至得。你知啦，貪曾嘅房策遺禍真係非常之大，躋身劏房、籠屋、棺材房嘅居民多到滿山滿谷，望樓興嘆嘅小市民更加不計其數，市建局如果學煲呔曾政府歎慢板唔嗲唔吊，舊區重建慢過蝸牛行路，香港人嘅住屋噩夢幾時至可以結束呀？

咁講啦，貪曾房策遺禍大，舊區重建要加快。靠一招需求主導未夠o架，當局快快諗計減省官僚程序，加快重建步伐，千祈唔好學前朝政府耽誤市民嘅「房事」幸福呀，叮！