SUN微博：打橫嚟講：唔係石頭爆出嚟的好打得

五年之前，仍係「妹仔」一名的林鄭月娥，升做環境局頭領後，單拖踩入皇后碼頭，舌戰群雄，一心一意接受前特首貪曾之命令，誓拆那荒廢無用的殖民地標誌，最終，係call差人到會清場，鎖走留守的保育人士，該次一箭定江山，被輿論封稱佢「好打得」！

噢！五年過後，香江人才大零落，林鄭好戰本能，助佢攀上政府第二把手要職。佢真好打得，起碼，一上任，手影無郁一吓，就打甩前上司掃把頭那塊老面皮，叫老婦棄甲裙甩褲甩的雞咁腳夾尾而逃！勁！

林鄭唔講，都無人知，原來佢做得咁辛苦，要「度日如年」咁慘情嘅！呵！好可憐耶！又無老公喺身邊攬住錫錫，真孤苦寂寞難耐啊！

林鄭單身留在香港做大官，又並非「石頭爆出嚟」咁突然嘅！佢應一早計劃好晒，叫老公駐英，安排好晒仔女在番邦讀書，好讓佢專心喺呢度「有勇氣推翻前朝政策」，向全世界揭示貪曾煲呔的所作所為，真偉大到痹囉！

林鄭好打得，但有時太得意忘形，我有需要提醒吓佢，就如前日，當林鄭提到學民思潮的黃之鋒唔同特首梁振英握手時，林鄭笑得很甜地話梁特首好不受人歡迎喎！喂！請你返嚟打人，唔該認路呀！

林鄭打得性起，話唔會將地產商放在心裏，真超勁！如果佢叫埋仔女返嚟受愛國教育，相信，佢嘅仕途更光明，國家領導人都有份做呢！為港爭光呀！正！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

就係敢爆：一簽多行有幾可行？

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot